تعليق ناري منة فضالي على عُري الفنانات وحضور الرقصات في مهرجان الجونة

0

تحدّثت الفنانة منة فضالي عن إطلالات الفنانات في مهرجان الجونة السينمائي الدولي، والتي تميز البعض منها بإثارة الجدل.

وقالت “منة”، في تصريحات تلفزيونية: “أنا واحدة طبيعتي بسيطة ومش بحب الشو ومبحبش ألبس حاجة غريبة مش شبهي، فيه لبس وألوان فاقعة مينفش تتلبس في مهرجان وفي النهاية إحنا في مجتمع شرقي وفيه لبس الناس مبتقبلهوش”.

وأضافت: “أنا بتقبل النقد في كل حاجة عادي، ومعنديش مانع أن حد ينتقد لبسي”.

وتابعت: “كل الفنانات اللي بيحضروا المهرجانات عايزين يلبسوا أحسن وأحلى من غيرهم، وده أمر طبيعي لأن كل واحد بيبقى عايز يظهر شيك أوي”.

وأكملت: “الفنانة هي من تختار لبسها الذي تظهر به، وتختار إما أن تثير الجدل أو تبقى شيك وبسيطة”.

وواصلت: “فيه فرق بين واحدة تظهر بشكل شيك وواحدة عايزة تلفت النظر وتروح المهرجان علشان تركب التريند”.

وذكرت “منة”: “يسرا بالنسبالي ملكة الأناقة ولفتت نظري في المهرجان وطول عمرها شيك، وأنا بحبها على المستوى الشخصي والفنانة درة أيضا شيك جدًا وهند صبري كانت تجنن.”

وعلّقت منة أيضًا على وجود الراقصات في مهرجان الجونة، قائلة: “أنا بشوف ناس غريبة جداً متواجدين في المهرجان، وملهمش دعوة بالفنانين، ومعرفش مين دول أصلا، ومعرفش بيتم دعواتهم بناء على إيه”.

وأضافت: “بقيت بشوف راقصات في مهرجان الجونة .. ده جديد بالنسبالنا رغم احترامي للرقص جداً .. لكن ده مش واجهة للفن، والمفروض إن اللي يبقوا موجودين مخرجين ومنتجين وفنانين وممثلين عالميين فقط .. فيه ناس مينفعش تتواجد”.

وتابعت: “أنا معنديش تحفظ على شخص بعينه ولكن الحوار مش لطيف وأنا ضد تواجدهم في مهرجان سينمائي فني”.

وعن الراقصة دينا، قالت: “دينا ممثلة وراقصة .. والفنانة فيفي عبده أيضاً ممثلة وراقصة .. عشان كده احنا بالنسبالنا بنشوفهم ممثلين ونجوم قبل أن يكونوا راقصات”.